Ang Katapusang Kapanahonan

Ang Antikristo ug ang Mini nga Propeta Sa Basahon Sa Pinadayag

Ang unang mapintas nga mananap sa bersikulo 13, nga migawas gikan sa dagat, mao ang Anti-Kristo. Ang dragon (si Satanas, ang dautan) mohatag sa iyang gahum ug dakung pagbulot-an ngadto sa mapintas nga mananap. "Ug siya (ang Anti-Kristo) gihatagan ug baba nga nagalitok ug mga dagkong butang ug mga pagpasipala, ug gihatagan siya ug pagbulot-an sa pagpadayon hangtod sa kap-atan ug duha ka bulan (ang kataposang 3 ½ ka tuig). Unya iyang giabli ang iyang baba sa pagpasipala batok sa Dios, sa pagtamay sa Iyang ngalan, Iyang tabernakulo, ug kanila nga nagapuyo sa langit (ang Amahan, si Jesus, ang iglesya ug mga manulunda). Gikatugot ngadto kaniya ang pagpakiggubat sa mga balaan ug pagbuntog kanila. Ang pagbulot-an gihatag kaniya ibabaw sa tanang banay, pinulongan ug kanasuran. Tanan nga nagpuyo sa yuta mosimba kaniya, kansang ngalan wala gayud masulat sa Basahon sa Kinabuhi sa nating Karnero nga giihaw gikan sa sinugdan sa kalibutan. Siya nga adunay igdulongog, papamati-a siya" (Pinadayag 13:5-9).

Ang Anti-Kristo usa ka tawo nga madanihon nga pagapaluyohan sa hilabihan sa daghang katawhan ug kanasuran; mao kini hinungdan nganong mitumaw siya gikan sa dagat (tan-awa sa bersikulo 17:15). Ang 2 Tessalonica 2:3-4, 9-10 midugang ug gamay mahitungod sa pagpunting kun kinsa ang Anti-Kristo. Siya usa ka tawo nga gipuy-an ug mga demonyo (bersikulo 16:13-14).

Ang ikaduhang mapintas nga mananap sa kapitulo 13, migawas gikan sa yuta mao ang mini nga propeta (ang Anti-Espiritu). "Aduna siyay duha ka mga sungay sama sa karnero ug mosulti sama sa dragon. Ug iyang gibuhat ang tanang paggahum sa nahaunang mapintas nga mananap sa iyang atubangan, ug hinungdan nga ang kalibutan ug tanan nga nagpuyo niini; mosimba sa nahaunang mapintas nga mananap… Iyang gihimo nga ang tanan, gagmay ug daku, adunahan ug kabos, gawasnon ug ulipon, sa pagdawat ug tatak sa ilang tuong kamot o sa ilahang mga agtang, ug nga walay si bisan kinsa nga mopalit o mobaligya gawas lamang kun adunay tatak o nagbaton ug ngalan sa mapintas nga mananap, o sa numero sa iyang pangalan. Ani-a ang kaalam. Tugoti siya nga adunay salabotan sa pag kwenta sa numero sa mapintas nga mananap, kay numero man kini sa usa ka tawo; ang iyahang numero mao ang "666" (bersekolo 13:11-12, 16-18). Kining maong mananap magahimo ug larawan – pagpasidungog sa Anti-Kristo, aron pagasimbahon sa tanang katawhan, ug kun adunay dili mosimba sa larawan pagapatyon. Siya maoy mopatuman sa marka sa mananap, ang numero 666, sa tanang katawhan sa kalibutan. Kining tawhana mobuhat sama sa "Balaang Espiritu" nagpasidungog sa Anti-Kristo (tan- awa ang Juan 16:14-15).

Ang tulo ka mga mananap sa Pinadayag mosulay pagsundog sa Trinidad sa Dios: Ang dragon ingon ang Amahan, ang Anti--Kristo ingon nga Kristo ug ang mini nga propeta ingon nga Balaang Espiritu.

Next: Ang Dautang Babaye sa Basahon sa Pinadayag