Building up believers and the New Testament church

Ang Katapusang Kapanahonan

Ang Milenyo

Sa Iyang ikaduhang pagbalik, lainon sa Ginoo ang mga tawo ngadto sa duha ka pundok, ang mga karnero (mga magtotoo) ug mga kanding (dili magtotoo). Ang Mateo 25:31-34, 41 naghisgot sa maong hitabo: "Ug inig-abut na sa Anak sa Tawo diha sa Iyang himaya, ug sa tanang mga manolunda uban Kaniya, Siya molingkod diha sa Iyang mahimayaong trono. Ug sa Iyang atubangan pagatapokon ang tanang kanasuran, ug iyang pagalainon ang usa gikan sa usa, maingon sa magbalantay sa mga hayop nga magalain sa mga karnero gikan sa mga kanding, ug ang mga karnero Iyang pagapinigon sa iyang too, apan ang mga kanding anha sa Iyang wala. Ug ang Hari magaingon kanila diha sa iyang too, "Umari kamo, O mga dinayeg sa Akong Amahan, panunda ninyo ang gingharian nga gitagana alang kaninyo sukad pa sa pagkatukod sa kalibutan; Unya ang Hari magaingon kanila diha sa Iyang wala, 'Pahawa gikan kanako, kamong mga tinunglo, ngadto sa kalayong walay pagkatapos nga gitagana alang sa yawa ug sa iyang mga manolunda."

Mao kini ang higayon diin pagatukoron ni Jesus ang Iyang gingharian alang sa usa ka libo ka tuig (milenyo) niining maong yuta. Mao kini ang katumanan sa saad sa Dios alang sa katawhan sa Israel, sama sa gihisgutan kaganina. Ang trono sa Hari ug Ginoong Jesus mahimutang sa Jerusalem, diin siya magahari dili lamang sa Israel, apan sa mga magtotoo sa tanang kanasuran sa kalibutan. "Siya mahimong bantugan ug pagatawgon nga Anak sa Labing Halangdon; ug Kaniya igahatag sa Ginoong Dios ang trono sa Iyang Amahan nga si David, ug Iyang pagaharian ang banay ni Jacob hangtud sa kahangturan; ug walay pagkatapus ang Iyang gingharian." (Lukas 1:32-33). Ug sa Oseas 3:5 giingon, "Sa human niana ang mga anak sa Israel mamalik, ug mangita sa Ginoo nga Ilang Dios, ug kang David nga ilang hari, ug mangadto sa Ginoo uban ang kahadlok ug sa Iyang pagkaayo sa ulahing mga adlaw."

"Unya dihay nakita ko nga mga trono, ug niini sila nanaglingkod, (ang mga gitugyanan sa pagpanghukom) ug ang paghukom gikatugyan ngadto kanila. Usab nakita ko ang mga kalag sa mga gipamunggotan sa ulo tungod sa ilang pagpanghimatuod mahitungod kang Jesus ug tungod sa pulong sa Dios, ug nga wala mosimba sa mapintas nga mananap o sa iyang larawan, ug wala modawat sa iyang marka diha sa ilang mga agtang o sa ilang mga kamot. Sila nangabuhi pag-usab, ug nanaghari uban kang Kristo sulod sa usa ka libo ka tuig. Ug bahin sa uban pa sa mga nangamatay, kini sila dili pa mabuhi pag-usab hangtud matapus una ang usa ka libo ka tuig. Kini mao ang nahaunang pagkabanhaw. Bulahan ug balaan ang tawo nga makaambit sa nahaunang pagkabanhaw! Sa mga tawong ingon niini ang ikaduhang kamatayon walay gahum sa pagbuot, hinonoa sila mahimong mga sacerdote sa Dios ug ni Kristo, ug uban Kaniya magahari sila sa usa ka libo ka tuig" (Pinadayag 20:4-6).

Kinsa man ang makasulod sa Milenyo? Labing gamay, adunay tulo ka mga pundok sa katawhan kinsa maoy magapanonod sa gingharian. Unang pundok: sila nga mitoo kang Kristo (human sa pagsakgaw) ug nagbaton sa Iyang pulong sulod sa kapanahonan sa Dakung Kasakitan, ug nagpabiling buhi hangtod sa pagbalik ni Jesus (Mateo 25:31-34, Daniel 12:1); Ikaduhang pundok; sila nga mitoo kang Kristo ug nagbaton sa Iyang pulong sulod sa kapanahonan sa Dakung Kasakitan, unya nangamatay na, apan pagabanhawon unya sa pag-abot ni Jesus (Pinadayag 6:9-11, 20:4). Ikatulong pundok: sila nga mga matinud-anong katawhan nga nagalakaw sa pagtoo sa panahon sa wala pa si Kristo, nga pagabanhawon unya sa pag-abot ni Jesus (Lukas 13:28-29, Mateo 8:11, Daniel 7:22, 12:13).

Uban pang mga basahon nga nagahisgot mahitungod sa milenyo o sa yutang gisaad mao ang Genesis 15:18, Exodu 23:31, Isaias 11, 27:12-13, Jeremias 23:5-8, Ezekiel 37:21-28, 39:22-29, Zecharias 14.